విష్ణు సహస్రనామ స్తోత్రము

విష్ణు సహస్రనామ స్తోత్రము

భగవంతుని పొందటం ఎలా ?

భగవంతుని పొందటం ఎలా ?
(1)రబీంద్రనాధ టాగూరు అంటారు :

భగవంతుని తెలుసుకోవటానికి మూడు మార్గములున్నాయి.
1.ఙ్నాన మార్గము­_ఇది అందరికీ సాధ్యము కాదు.వేలితో లెక్కపెట్టతగినంత మందికే సాధ్యము.
2.కర్మ మార్గము_ఇది కూడా చాలా తక్కువ మందికే సాధ్యము. కోరికలు చంపుకున్న
వారే కర్మ ఫలములను పొందగలరు.
3.భక్తి మార్గము_ఇది అన్నిటికన్నా సులభము.భక్తి ,నమ్మకము,ప్రేమ భగవంతుని దగ్గరకు
చేర్చుతాయి.”

(2)సాయి బాబా అంటారు :

భగవంతుని చేరటానికి 6 మార్గాలున్నాయి.
1.మంచి సాంగత్యము
2.ఙ్నాన మార్గమును అనుసరించుట
3.ఏకాగ్ర భక్తి
4.ఎల్లప్పుడు భగవంతుని గూర్చి మాట్లాడుట
5.భక్తి ఉన్నత స్తాయికి చేరినప్పుడు నవ్వుట,ఏడ్చుట, శరీరము వశము తప్పుట
6.శరీరముతో సహా తనను తాను మర్చిపోవుట”

(3) మహాత్ములందరి ఉపదేశ సారం :

౧. గొప్ప గొప్పవాటిని పొందాలనే కోరిక, తపన సర్వమానవ సహజం.
౨. విశ్వమంతటికన్న విశ్వేశ్వరుడు గొప్ప !
౩. ఆ భగవంతుడిని పొందాలంటే -అతడు భక్తికి మాత్రమే వశ్యుడు !
౪. భక్తి యనగా భగవంతునియందు పరమ ప్రేమ.
౫. ఆ ప్రేమ అవ్యాజముగా నున్ననే భగవంతుని ఆకర్షింప గలుగుతుంది.
౬. తమ తమ స్వార్థముతో గాకుండా, ఏమీ ఆశించకుండా -
” నన్ను నన్నుగా ప్రేమించే “వారినే మనుష్యులు ఎక్కువగా ప్రేమిస్తారు కదా.
౭. దేవుడూ అంతే ! అసలు ఈ గుణం ఆయననుంచే మనకు అబ్బింది.
” భగవంతుని కొరకే భగవంతుని ప్రేమించే ” వారినే, భగవంతుడు కూడా ప్రేమిస్తాడు.
అలా కాకపోతే, అది మనవైపునుంచి జరిగే ” ఒక వైపు మాత్రమే ” ప్రేమ అవుతుంది.
అప్పుడు భగవంతుడు ప్రేమించడు కానీ, జాలి పడతాడు, దయ జూపుతాడు.
ఆ స్థితి ఏ నిజమైన ప్రేమికకైనా సహింప శక్యమా ?!
౮. పూర్వకాలంలో వలె – చదువుకున్నాకూడా ఇతర వ్యాపకాలు లేకుండా, క్రొత్తగా పెళ్ళి అయి,
కాపురానికి వెళ్ళబోయే సుగుణవతి అయిన నవ-వధువు వలె -
సర్వకాల సర్వావస్థలయందు భావనలన్నీ యోగ్యుడైన పతి ( జగత్పతి ) యందే పరిభ్రమిస్తూ ఉంటే -
ఆ మాధుర్య – ఆనంద స్థితియే భక్తికి పరాకాష్ఠ ! ఆ ( జగత్ ) పతియొక్క ప్రేమలో
కరిగిపోవటమే జీవన సాఫల్యం !
౯. భావనలో భక్తి -తాదాత్మ్యం కుదురుకున్నాక, ఏం చేసినా, ఎలా చేసినా, ఏ రూపాన్ని కొలిచినా,
ఏనామాన్ని స్మరించినా, నవవిధ భక్తులలో ఏ మార్గాన్ని అనుసరించినా -
అంతా భగవత్-సాన్నిహిత్యమే; అంతా భగవత్-సంయోగమే; అంతా ఆనందమయమే !

భగవన్-నిర్గుణ మానస పూజా ( శ్రీ శంకరాచార్య కృతమ్ )

భగవన్-నిర్గుణ మానస పూజా ( శ్రీ శంకరాచార్య కృతమ్ )

1    అఖణ్డే సచ్చిదానన్దే నిర్వికల్పైకరూపిణి |
స్థితే2ద్వితీయ-భావే2పి కథం పూజా విధీయతే ||

అఖండమూ, నిర్గుణమూ అయిన సచ్చిదానంద స్వరూపుడూ అయిన
పరమాత్మకు పూజ ఏవిధంగా చేయగలము?!

2    పూర్ణస్యావాహనం కుత్ర సర్వాధారస్య చాసనమ్ |
స్వచ్ఛస్య పాద్య మర్ఘ్యం చ శుద్ధస్యాచమనం కుతః ||

౧    ఆవాహనం :  పరిపూర్ణుడైన ( అంతటా నిండియున్న ) స్వామిని
ఎక్కడినుంచి ఎక్కడికి ఆహ్వానించగలము ?!
౨    ఆసనం :  సర్వమునకు తానే ఆధారముగా ఉంటున్న స్వామికి
ఆధారముగా ఏ ఆసనమును సమర్పించగలము ?!
౩,౪    పాద్యం, అర్ఘ్యం :  నిత్య స్వచ్ఛుడు అయిన స్వామియొక్క పాదపద్మములను,
కరకమలములను శుద్ధిచేయగల ఉదకము లున్నవా ?!
౫    ఆచమనం :  నిత్య పరిశుద్ధుడు, సర్వపావనుడు అయిన స్వామికి
ఆచమనం ఎందులకు ?!

3    నిర్మలస్య కుతః స్నానం వాసో విశ్వోదరస్య చ |
అగోత్రస్య త్వవర్ణస్య కుత స్తస్యోపవీతకమ్ ||

౬    స్నానం : మాలిన్యమే లేని నిర్మలునకు స్నానం వల్ల ప్రయోజనం ఉందా ?!
౭    వస్త్రం :    విశ్వమంతటినీ తన ఉదరంలోనే దాచుకున్న స్వామికి,
ఆయన దేహాన్ని కప్పగల వస్త్రం ఏమివ్వగలము ?!
౮    యజ్ఞోపవీతం : స్వయముగా ఏ గోత్రము, ఏ వర్ణమూ లేనట్టిన్నీ,
అన్ని గోత్రములకూ, అన్ని వర్ణములకూ మూలమైనట్టిన్నీ,
అనుపనీతుడైనట్టిన్నీ  స్వామికి
యజ్ఞోపవీతము ఏమని సమర్పించగలము ?!

4    నిర్లేపస్య కుతో గన్ధః పుష్పం నిర్వాసనస్య చ |
నిర్విశేషస్య కా భూషా కో2లఙ్కారో నిరాకృతేః ||

౯    గంథం : కర్మాకర్మలూ, పాపపుణ్యాలూ ఏవీ అంటని స్వామికి
గంథం పూయటం ఎందులకు ?!
౧౦    పుష్పం : ఏ వాసనలూ లేని, అంటని, వాసనారహితుడైన స్వామికి -
ఆత్మ-చైతన్య ప్రకాశం కలిగిన సువాసనా-యుతమైన
మనఃపుష్పాన్ని సమర్పించాలిగాని -
ప్రకృతిలోని పుష్పముల సమర్పణ ఎందులకు ?!
ఆభరణాని : ఆకాశం వలె సర్వవ్యాపకంగా ఉంటూ, అవయవములు లేనట్టి
స్వామికి ఆభరణాలు ఎక్కడ ధరింప జేయగలము ?!
అలంకారం : నిరాకారుడైన స్వామికి ఏమి అలంకారం చేయగలం ?!

5    నిరఞ్జనస్య కిం ధూపై ర్దీపైర్వా సర్వసాక్షిణః |
నిజానన్దైక-తృప్తస్య నైవేద్యం కిం భవేదిహ ||

౧౧    ధూపం : నిరంజనుడైన స్వామికి ధూపము లెందులకు ?!
౧౨    దీపం :    సర్వసాక్షియై, సర్వ దృశ్యములకూ దృక్ స్వరూపుడైనట్టి
స్వామికి దీపదర్శనము వలన ఏం ప్రయోజనం ?!
౧౩    నైవేద్యం : అఖండ – ఆత్మానందము ననుభవిస్తూ తృప్తుడైన స్వామికి
నైవేద్యముగా  ఏమి ఇవ్వగలము ?!

6    విశ్వానన్దయితు స్తస్య కిం తాంబూలం ప్రకల్పతే |
స్వయంప్రకాశ-చిద్రూపో యో2సావర్కాది-భాసకః ||

7    గీయతే శ్రుతిభి స్తస్య నీరాజనవిధిః కుతః |
ప్రదక్షిణ మనన్తస్య ప్రణామో2ద్వయ వస్తునః ||

౧౪    తాంబూలం : విశ్వాన్ని అంతటినీ ఆనందమయము చేసే స్వామికి
ఆనందకరంగా ఉండే తాంబూలం ఏమివ్వగలం ?!
౧౫    నీరాజనం : వేదములు ఎవరినైతే, ” చిద్రూపుడు, స్వయం ప్రకాశ స్వరూపుడు,
సూర్య చంద్రాగ్ని గ్రహ నక్షత్రాదులను భాసింప జేస్తున్నాడు “
అని కీర్తిస్తూన్నాయో, అట్టి స్వామికి ఏమి హారతులివ్వ గలము ?!
ప్రదక్షిణం : దిక్కులు అన్నీ కూడా ఎవరిలోనే లయిస్తూన్నాయో, అట్టి
అనంతుడైన స్వామికి ప్రదక్షిణములు సాధ్యమా ?!
నమస్కారం : సర్వమూ తానేయైన వానికి, రెండవ వస్తువే లేని అద్వితీయుడైన
స్వామికి నమస్కారము చేయగలవారు ఎవరు ?!

8    వేదవాచా మవేద్యస్య కిం వా స్తోత్రం విధీయతే |
అన్తర్బహిః సంస్థితస్య ఉద్వాసనవిధిః కుతః ||

౧౬    మంత్రపుష్పం ( స్తోత్రం ) : అన్నిటినీ తెలుసుకునేవాడే గానీ, దేనిచేతా
( వేద-వాక్కుల చేతకూడా ) తెలియబడని వాడైన స్వామికి
ఏ వాక్కులతో స్తోత్రం చేయగలము ?!
ఉద్వాసనం : విశ్వమునకు లోపలా, బయటా వ్యాపించియున్నట్టి
స్వామికి ఉద్వాసనం చెప్పటం ఎలా సాధ్యం ?!

[ అయినా స్వామీ ! నీకు సకలోపచార పూజలను చేస్తూనే ఉంటాం !
" చంద్రునికో నూలుపోగు ! " అన్న చందంగా;
నీ మహిమను స్మరించటానికీ, భావించటానికీ ఒక అధారరూపంగా ! ]

********************************************